LUNGLEI ROCK BAND, SEVENITY KHA (in Mizo Language)

Genre                                      : Gospel Rock

Years active                            : 2001-2004

Location                                  : Zohnuai, Lunglei

BAND LINE UP

Vocals                                     : Lalnundika Hnamte

Keyboard                                : Pt. Lallawmsanga (Sisanga)

Guitar                                      : C.V.L. Hmangaihkima (Kima Chhangte)

Bass & Backing vocals           : C. Lalawmpuia (C. Awma)

Drums                                     : Pc. Lalduhawma

BIOGRAPHY

1. A Bul Tanna: Metal Blade          

Pt. Lallawmsanga & Friends (1997)

BCM Zohnuai Fakna Inkhawm, 1997 khan kei, Sisanga leh Rinkima te'n “Khawngaihna mak mawi leh duhawm” chu 3-piece band angin kan lo perform tawh a. Hetih hunlai hian band ang chiah pawhin kan la ding lova, mahse hemi hnu hi chuan kohhran lamah chanvo kan nei chho ta fo a ni. Keimahni bila kan hla phuah (original) hmasa ber, “I vanglai hian i Siamtu hre reng rawh” chu TKP Zohnuai Unit Silver Jubilee, 2000 khan Pt. Lallawmsanga & Friends tihin audio cassette tihchhuahah a tel ve a ni.

Kum 2001 khan Gospel Rock band anga indinin a hmingah Metal Blade kan vuah a. Hetah hian kei vocalist/rhythm guitarist niin, Sisanga chu lead guitarist a ni a, Rinkima chu bass guitarist a ni bawk a. Drummer-ah Remruata emaw Kima Chhangte emaw kan hmang deuh ber thin a, member ni chiah lovin guest drummer an ni deuh ber. Metal Blade hian keimahni kutchhuak hla engemaw zat kan nei ve hman a, chung zinga thenkhat te chu- "The Final Judgement", "I Ram Ka Thlen Hma Zawng", "I Vanglai Hian I Siamtu Hre Reng Rawh" leh "Isua Pan Rawh" tihte an ni hlawm. Metal Blade kan din hma hian Zohnuaiah chuan Kamikaze (1990-95 vel) leh Resurrection Sound (1995-98 vel) chauh lo chu band ding an lo la awm meuh lo.

            Kum 2001 vek khan Metal Blade hian veng chhunga kan thiante puihnain kan bawng in hlui kan chei tha a, 30ftx15ft practice room chu kan nei ve chu a ni mai a. Hei hi The Boom Box kan ti mai thin. Hetah hian kan thiante pawhin min lo tel pui ve bawk thin. Sevenity pawh hi helai hmun atanga lo piang chhuak a ni nghe nghe.

            Kan thiante leh rual u thenkhatte chuan Metal Blade tih hming hi gospel band hming atan chuan “A rorum deuh lo maw?” an ti thin. Chu bakah Metal Blade hi record label hmingah a lo awm tawh bawk a ni.

2. Sevenity Kan Din Dan

            Jam room thar, the Boom Box kan neih hian Metal Blade min thlak danglam nasa em em mai a. A hmasa berah chuan Rinkima'n band hi min chhuahsan a, a chhan tak chu ka hre tawh chiah lo nain hetih lai hian High School zirlai kan ni hlawm a, zirna lam tulna avang ni berin ka hria. Metal Blade-a kan lo play-pui thin, Remruata (drummer) leh Kima Chhangte (guitarist) chu band-ah kan lalut a, tin, Rinkima (bassist) thlak turin C. Awma a rawn lut bawk a. Tichuan Metal Blade chu 5-piece band kan lo ni ta reng a. Band pawh chu a hming thlak kan duh ta hial a. Band hming tur chi hrang hrang kan ngaihtuah hnuah Sevenity hi kum 2003 khan kan vuah ta a ni. Hei hi Sevenity din a nih dan chu a ni.

Kan genre pawh chu Heavy Metal ai mahin Progressive/Hard/Soft Rock lamah kan kal ta zawk a. Iron Maiden leh Metallica tih vel aiin Dream Theater, Stryper, Petra lam kan awn ta zawk a ni. Hetia band lineup leh genre kan thlak takah chuan, Sisanga pawh chuan guitar aiah keyboard a play ta daih a, tin, keiin guitar hungin vocals chauh ka chang ta thung a ni.

Instruments hi zirlai rual kan nih angin lei mai a harsa em em a, amaherawhchu ka pa, Pu Lalduhawma Hnamte hian kum 1990 vel khan home studio hi a nei ve thin a, heta a instruments leh sound system la kawl thatte chu kan rochunsak a ni deuh mai a. Drum set erawh alo tihral tawh avangin mi ta kan hawh a ngai ta zel a, TKP drum set pawh kan hmang nasa hle. Lungleiah khang hunlai khan Battle Cry, Purple Haze, Gospel River Band, Sevenity leh GIORAS lo chu rock band active kha kan awm vak lo bawk a ni.

            Tum khat chu hetih hunlaia Mizo zaithiam lar pakhat (a hming chu tarlang lo mai ila), RTP Cinema Hall-ah concert a rawn nei dawn a, Organiser-ten min duhsakin perform turin min sawm ve a. Kan hla sak tur chungchangah thu a inhmu lo deuh niin ka hria, concert hma kar khat velah chuan kan thianpa tho, Duhawma chu drums vaw turin kan sawm chawp ta a. Heta tang hian Duhawma chu Sevenity drummer thar atan kan la chu a ni ta mai a. Mahse hemi tum hian concert-naah chuan kan zai leh ta lem chuang hlei lova. Kan hla sak tum kha tun hnua ka ngaihtuah let hian Remruata khan alo tidik a ni tih hi ka hria a, hemi tuma kan perform thei lo pawh kha Pathian remruatna zawk a nih hi ka ti thin. Remruata hi kan thian tha tak a ni a, kan jam ho leh fo va, a music duhzawng takin band hrante pawh a din ve nghe nghe a ni.

4. Sevenity Inlanna Langsar Zual

2002?: Saikuti Hall Inaugration Show (avialable in VCDs):

2003: Chawngfianga Memorial School Inaugration (avialable in VCDs)

2003: Riangvaite Pual Christmas Concert (avialable in VCDs)

2003?:Gospel River Band Concert (Sevenity hian an show hi kan hawnsak a ni) (avialable in VCDs)

2005: Project Zodingdi Gospel Vol.1 (Track no.5, Sevenity Kraws Vuan Zelin)

5. Seventiy Hla (Originals) Thenkhat

1.      Kraws vuan zelin (Sevenity: 2003)

2.      I vanglai hian I siamtu hre reng rawh (Sisanga, Nundika, Rinkima: 2000)

3.      Thlarau Hahchawlhna (Sevenity)

4.      Damna Famkim (C. Awma)

5.      I ram ka thlen hma zawng (Sisanga, Nundika: May 2002)

6.      Thian duhawm, Isua (Nundika: July 2002)

7.       Isua pan rawh (2001: Sisanga, Nundika) 

8.      Chanchin Tha (Sevenity: 2004)  

9.      Send the message out (Nundika: 2002)

10.  The Final Judgement (Sisanga, Nundika: 2000)

6. Kraws Vuan Zelin Music Video

Still image from Kraws vuan zelin music video (2004)

“Kraws vuan zelin” hi Sevenity-in music video kan tihchhuah awm chhun a ni a, hei hi Leitlangpui Project Zodingdi Volume 1-ah khan track number 5-naah a awm a ni. A phuah dan chungchang sawi hmasa ta ila. Kum 2003-a band kan indin that a, jam room te kan han neih takah chuan regular takin kan jam ve thin a. Zan khat chu kan jam naah Kraws vuan zelin keyboard part hi Sisanga’n a rawn play a, chu chu musician dangten rawn zawmin hla atan kan phuah chho a ni ta reng mai a. A hla thu hi Ka Hla Phuah Bu (Book 1), No.48-naa a lan dan chuan Music: Sevenity, Words & Harmony: Nundika, 26^th May, 2003, 1:00 AM tiin a lang a ni.

Kima Chhangte

Hetih hun lai hian Lungleia zaithiam leh band te promote nan, Project Zodingdi music video mi thahnemngaiten siam an tum a. Chuta tel ve tur leh audio demo thehlut turin sawmna kan dawng hlauh mai a, kan lawm kher mai. A hmassa berah chuan demo thehlut tura min tih angin chu mi atan chuan kan inbuatsaih ta char char a. Recording hi a tirah chuan Pu B. Lalrammuana home studio-ah tih kan tum a, ani hi kan u, band music lamah pawh experience engemaw chen lo nei ve tawh a ni. Mahse recording kan tih hma chuan a computer sound card a kang chhe hlauh mai a, chuvangin Zama Studio, Serkawn-ah recording chu kan ti ta a ni. Hetih hunlai hian Zama Studio hi Serkawn Indoor chhungah a awm thin a, music recording bik hi ni 2-3 vel chhung kan beiin ka hria. Recording hi a tua te hmah hian kan lo uluk em em lova, “Demo tur ania, nakinah a final tur chu uluk zawin kan titha dawn nia,” tiin vocals phei chu kan venga mitthi tlaivar tukah kan han record a, vawi hnih khat ka sa chhuak puat a, Pu Rammuana mix turin kan hawn ta niin ka hria. Demo kan submit hnu chuan video siam turin approval kan hmu thuai a ni.

Duhawma

Kum 2003 vel kha chuan Mizo music video hi tam tak a la chhuak lem lova, band video ngat phei chu a vang leh zual. Kan video hi a hmuhnawm nan concept/thawnthu engemaw neihtir kan duh ve si a, band meeting-in a concept turte kan han ngaihtuah ve a, a video lo hmu tawhte chuan kan hre awm e. Video hi Pu Lawmtea, Bazar min shoot-sak ni tain ka hria. Video-ah hian a changtupa berah ka tang nghal a, Pu Lalrinzuala (Pu Pamama) leh Pi Kawlrosiami te bakah band member-te video-ah hian kan lang a. Shooting hi Pu Lalduhawma Hnamte te in, Pi Kawlrosiami te in, BCM Biak In Zohnuai, leh Serkawn mualah te kan nei.

7. Sevenity Tawpna

            Kum 2004 khan Bangalore-ah BA zir turin ka liam thla a, Project Zodingdi release pawh hi ka awm ve ta lovin ka hria. Hemi hnu hian Sevenity hian recording thar kan neih chhunzawm ta lova, veng chhungah te chuan a la awmte chuan han perform ve leh zeuh thin mahse rei an daih ta bik lo niin ka hria. Tin, band member-te hi zirna leh hna tul avangtein kan awm darh nuk ta hlawm bawk a ni. 

2012: C. Awma, Nundika and Sisanga

Kima Chhangte hi Aizawl-ah music zirin studio-ah te a thawk chho a, a inbengbel chho chu a ni ta mai a. Tunah hian Home Free Music studio leh music zirna school a nei a, Mizo music-ah contribution tam tak a nei tawh a, a nei mek zel bawk a ni. A hla phuahte pawh vawiin thlengin Mizo zaithiam lar tak tak ten an la sa reng a, ama sak ngeite pawh youtube lamah a dah bawk a ni. 

C. Awma pawh Aizawlah tho music a zir a, ani hi Mizo Lengzem/Lenglawng solo artist tha tak a ni chho a, music video tha tak takte pawh a tichhuak hman a ni. Mahse kuthnu tam tak nei lovin a reh ta mai a, a uiawm hle a ni. 

Sisanga hi Aizawlah tho computer zirin a awm chhuak ve leh a, ani hi Lungleiah sawrkar hna thawkin a awm thung. 

Duhawma erawh AICS-ah zirin tunah BCM hnuaiah Chakma Field-ah Missionary hna thawk mek a ni. 

Kei chu Bangalore-a BA leh MA ka zir zawh khan Hyderabad-ah M. Phil. ka zir leh a, kum 2012-a Mizoram ka rawn haw chhoh leh khan thenrualte kan kim thei ta lo a ni! Sevenity hian reunion erawh kan nei a, Zohnuai Centenary, 2012 khan kum 10 dawn hnuah stage-ah kan ding ho leh thei a ni. 2012 vek khan BCM Zohnuai East indan dawnin TKP Nghilh Loh Zan programme-ah kan perform leh a, hei hi Sevenity hun hnuhnung ber chu a ni ta a ni. Kum 2013 khan Aizawl lamah hna thawkin ka awm sawn ve leh nghal a, kum 2017 October-a nupui ka neih khan music lama ka bul tanpui, kan band keyboardist, Sisanga hi ka thianah a tang bawk a ni.

Nundika &Temi Sailo wedding with Sisanga as Best Man and Zonuni as Maid of Honour.

-          Lalnundika Hnamte (Written on 27 Feb, 2008. Revised on 4 June, 2019)